நீ

உனது பெயரின் கவிதை
திறக்கப்பார்க்கிறது 
அடைபட்டுக்கிடக்குமோர்
மிருகத்தின் கூண்டை
,..

மையல் . . .

தேய்பிறை நிலவில்
எரிகின்றது காடு.
நிலவெரித்த மிச்சத்தை
சேர்த்து வைக்கும்
எனது முயற்சிகளை
முடிபோட்டுத் திரிகொளுத்துகிறது
உன் அருகாமை.
காட்டில் தொலைவதற்கும்
காடே தொலைவதற்கும்
உள்ள வேறுபாட்டை
யோசிக்க விடாமல்
தற்பொழுதில் நின்று திரிகிறது
காலம்.

,..

சாத்தியங்கள்

இருளடர்ந்த சாத்தியங்கள் குறித்து
இதுவரை
எதுவும் பேசாமலே இருந்துவிட்டோம்.
வெளிச்சம் போலும் வாழ்வு
என்னும்
வெற்று நம்பிக்கையில் இன்னும்
எத்தனை நாள் ஓடப்போகிறது
வண்டி.

,..

ஒரு பறவையும் நிறைய வானங்களும்

மோகம் கொண்டலையும்
மனதின் பள்ளத்தாக்குகளில்
பறந்து திரியும் பறவைக்கு
வெளிச்சமும் வானமும்
வேறு வேறுதான்

,..

அடுத்த கதை

முழுக்கதையையும் கேளாமல்

நீயாய் எடுத்த

முடிவுகளுக்குப் பின்னால்

அலைந்து திரிகின்றன

என் அத்தனை கதைகளும்...

.,

கதை சொல்லல்

ஆளுக்கொரு கதை சொல்லி

அதை உண்மைக்கு அருகில்

நிறுத்தப் பார்க்கிறோம்.

உண்மையோ

ஏதொன்றிலும் நிலைபெறாமல்

அலைந்து திரிகிறது.

நிற்க வைத்த கதைகள்

நின்றபடி இருக்க

ஒருபொழுது மறுபொழுதாகையில்

ஒரு வாழ்க்கை தூரம்

தள்ளி நிற்கும் உண்மை.

நாம் சொன்ன கதைகளைப்

பிறர் நம்புவதைக் காட்டி

நம்மையும்

நம்பச்சொல்வார்கள் இனி.

கதைகளின் வாசனை

நிரம்பி நிற்கும் வெளியில்

உண்மையைப் பற்றிக் கவலைப்பட்டு

என்ன ஆகப்போகிறது.

முதல் மழை இரவு

கட்டங்கள் உருள

பகடைகளில் நகர்ந்து

ஏணியில் இறங்கி

பின்

பாம்பின் வால் வழி ஏறி

அதன் வாயடைந்து நிற்கையில்

பார்க்க நேரிட்டது

விஷம் தொக்கி நிற்கும்

பல்லொன்று.

இனி பரமபதம் அடைவதை

தள்ளி வைத்து

என்ன ஆகப்போகிறது.

.,

கடல் சேர்தல்

ஒற்றை மழைக்கெல்லாம்

நிறைந்தொழுகும்

நதியல்ல என்னுடையது.

பருவம் தவறிப் பெய்த மழையில்

பின்னெப்படி

கடல் வந்தடைந்தேன்

என்பது மட்டும் புரியவில்லை.

மின்னிப்போனாய்

கனவுகள் வேய்ந்த கூரைக்குக் கீழ்

அமர்ந்திருந்தார்கள் அனைவரும்.

உள்நுழைந்த நிலவொளியில்

உனதிருப்பை உணர முடிந்தது.

முதலில் பெய்த மழையைக் குறித்து

பேச ஆரம்பித்த போது

நீ எழுந்து போனாய்.

வானத்தை இரண்டாய்ப் பிளந்தபடி

கடந்து சென்றது ஒரு மின்னல்.

அதைத் தொடர்ந்து வராத

இடியைக் குறித்து

எவரும் கவலைப்பட்டதாய்த் தெரியவில்லை.

.,

பெய்யா எழுத்து

பார்வைக்கு அருகில் பெய்யும் மழை

குடை பிடிக்க முயலும் இமைகள்

இடப்புறம் நடக்கும் நீ

வலப்புறம் திரும்பிப் பார்க்கிறாய்

சரி விடு

நனைந்தே கழியட்டும் பொழுது

பிழை திருத்தம்

தேவதைகளுக்கும் உனக்கும்
வெகு தூரம்தான்
நிலவொளியில் நீ நில்லாதவரை