நனைதல் பொருட்டான மழை . . .

உனது பெயரின் கவிதை 

திறக்கப்பார்க்கிறது 

அடைபட்டுக்கிடக்குமோர் 

மிருகத்தின் கூண்டை.

,..

சிறகுள்ள கவிதை

புதிதாய்ப் பிறக்கும் 

குழந்தைகளிடம்  எல்லாம் 

கொடுத்தனுப்பப்படுகின்றன 

ஓராயிரம் வார்த்தைகள்.

பின் 

மௌனம் பழகும்  

ஒவ்வொரு பொழுதிலும் 

வார்த்தை சேர்த்து விளையாடும் 

சின்னக்கைகளுக்குள் 

சிறகு வளர்க்கின்றன 

பின்னொரு பொழுதின் 

கவிதைகள்...

,..

. . .

எனக்கும் எனக்குமான

இடைவெளிக்குள்

அடைபட்டுவிடுகின்றது
எல்லையில்லாப் பெருவெளி

,..

மையல் . . .

தேய்பிறை நிலவில்
எரிகின்றது காடு.
நிலவெரித்த மிச்சத்தை
சேர்த்து வைக்கும்
எனது முயற்சிகளை
முடிபோட்டுத் திரிகொளுத்துகிறது
உன் அருகாமை.
காட்டில் தொலைவதற்கும்
காடே தொலைவதற்கும்
உள்ள வேறுபாட்டை
யோசிக்க விடாமல்
தற்பொழுதில் நின்று திரிகிறது
காலம்.

,..

முன் பின்னறியா மழை

மழையைத் துரத்திக்கொண்டு ஓடும்
குழந்தைகளைத்
துரத்திக்கொண்டு போகிறது
இன்னொரு மழை

,..

ஏழாவது குரல்

ஏழாவது மனிதனின்

குரலைக் கேட்க

காத்திருந்தவர்

மொத்தம் எட்டுப்பேர்

,..

மொழியும் நீ . . .

மொழியின் அமைதி குறித்து

முன்பொரு முறை உன்னுடன்

பேசியதாய் ஞாபகம்.

இப்போழுததை நினைவுபடுத்தி

பின் பலமுறை

பேச நேரிட்டாலும்,

அமைதியாகவேதான்

இருக்குமோ என்னமோ -

மொழியும்,

மொழியின் அமைதியும்?

,..

இன்னும் சில மரங்கள்

வழியெங்கும் இலையுதிர்த்துக்

காத்திருக்கின்றது

காலம்

இன்னும் கொஞ்சம் பூக்கள்

மலர்வதர்க்கும்

இன்னும் சில காய்கள் கனியாகிப்

பின் மண்சேர்ந்து மரமாவதற்கும் ...

,..

நிழல் பூனை ...

தனித்திருக்கும் பூனைக்குப்பின்னே

தனித்திருக்கிறது

நிழல்

,..

மழையிடை...

தேநீர் இடைவேளையில் பெய்த மழை

பார்த்திருக்க முடிவதில் சந்தோஷப்படுகிறார்கள்

வறட்டு பூமி நனைந்தும் சிலிர்ப்பதில்லை

,..

எம் தேவி

உறையும் புன்னகைகள் நிறைந்திருக்கின்றன

என் வெளியெங்கும்

ஒரு வார்த்தை சொல்

உருகி கரைந்து போகட்டும் அத்தனையும் ...

புரிதல் கொல்

புரிந்து கொள்ளாதவர்களின் மத்தியில்

நமது புரிதல் கூட

அர்த்தமற்றுப்போவது

வியப்பாயிருக்கிறது

,..

,.. தொடரும்

உலகத்தில் மனிதர்கள்
மூன்று வகை
மரணம் கேட்டவர்கள்
மரணம் பார்த்தவர்கள்
மற்றும்
மரணம் அறிந்தவர்கள்.

,..

சாத்தியங்கள்

இருளடர்ந்த சாத்தியங்கள் குறித்து
இதுவரை
எதுவும் பேசாமலே இருந்துவிட்டோம்.
வெளிச்சம் போலும் வாழ்வு
என்னும்
வெற்று நம்பிக்கையில் இன்னும்
எத்தனை நாள் ஓடப்போகிறது
வண்டி.

,..

ஒரு பறவையும் நிறைய வானங்களும்

மோகம் கொண்டலையும்
மனதின் பள்ளத்தாக்குகளில்
பறந்து திரியும் பறவைக்கு
வெளிச்சமும் வானமும்
வேறு வேறுதான்

,..

காலமற்றிருத்தல்

ஒவ்வொரு நாளும்

உதிக்கும் சூரியன்

காலத்தை

ஞாபகப்படுத்துகிறதா

இல்லை

நியாயப்படுதுகிறதா?

,..

...

காலமற்றிருந்த நதியோடி

உருண்டிருந்த வாழ்வில் தொடங்கி

துப்பாக்கி தூக்கியலையும்

முரட்டுக்காலணி மனிதர்கள் வரை

கூழாங்கற்கள்

பார்த்திருந்தது ஏராளம்.

மோதி வீழ்ந்து

விறைத்திருந்த முனைகள் ஒடிந்து

மென்மை பழகி

இசைவயப்பட்ட

அவற்றின் ஒற்றைப்பாடம்

எவருக்கும் புரியாமல் போவதையும்

இனி

பார்த்திருக்கக்கூடும்.

...

மறுகரையில் இருப்பதாகச்சொல்லி

செய்தியனுப்புகிறாய்.

நம்மிடையே நதியோடியிருந்த

காலம் போய்

வெகுநாட்களாகிவிட்டது.

இப்போது நான் வந்து நிற்கும்

கடலுக்கு

எந்தெந்தப்பக்கம் எத்தனைக்கரைகள்

என்று

யாருக்குத்தெரியும்?

...

அழகிய கைகளின் சித்திரப்பாவைதான் ... 

ஆனாலும் என்ன? 

ஆட்டுவித்தால் 

ஆடித்தான் ஆக வேண்டியிருக்கிறது ...

...

செவிகளை என் பக்கம் சாய்த்து,

கண் மூடி அமர்கிறாய்,

வார்த்தைகளற்றுப் போகிறது எனக்கு ...