இன்னும் சில மரங்கள்

வழியெங்கும் இலையுதிர்த்துக்

காத்திருக்கின்றது

காலம்

இன்னும் கொஞ்சம் பூக்கள்

மலர்வதர்க்கும்

இன்னும் சில காய்கள் கனியாகிப்

பின் மண்சேர்ந்து மரமாவதற்கும் ...

,..

நிழல் பூனை ...

தனித்திருக்கும் பூனைக்குப்பின்னே

தனித்திருக்கிறது

நிழல்

,..

. . .

மிகையற்றிருத்தலின்

கலை

வசப்படவேண்டுமினி ...

ஒரு ஊரில் ஒரு கடல் ...

கடலோடிக்கிடந்த நினைவுகள்

கரை சேர்ந்த கதையறிந்து

பார்க்க வந்திருந்தாய்...

ஆர்ப்பரித்துத் தணிகின்றது,

அலைசூழ் கடல்...

,..

நாளைய கதை

நிதி காக்கும் பூதத்தின் கதையை கேட்க

கண்மூடி அமர்ந்திருக்கிறாய்.

உன் இமை காக்கும் கண்களின் கதையை

வேறொரு நாள் சொல்லப்போகிறேன்.

,..

மழை பெய்யும் தெரு

நனைந்திருக்கும் வீடுகளின்

அழைப்புமணியிசைத்து

வாசற்கதவு மற்றும் ஜன்னல்கதவுகளை

திறந்து வைக்கச்சொல்லுங்கள்.

கொஞ்சம் உள்ளுக்குள்ளும் பெய்யட்டும்

மழை.

,..

மழைப்பேச்சு...

ஒரு மழை

பெய்து தீரும் வரை

பேசியிருக்கலாம் என்றாய்.

அந்திச்சூரியன்

எதிர்வானில் தெளிக்கும்

நிறக்கூட்டத்திற்கு அப்பால்

தெளியத் துவங்கியன

மழை மேகங்கள்.

,..