எந்தக்கணத்தில் தங்கிநிற்கிறது

நம்மைப் பிரித்து வைத்த

மௌனம்.

அதைத் தெரிந்து கொள்ளும்

கணத்திலேயே

மறந்து போகலாம்

நாமிது வரை

கற்றுக்கொண்ட

அத்தனை மொழிகளும்.

எனது

ஒழுங்கின்மைகளின் பக்கங்களில்

எழுதப்பட்டிருக்கும் கவிதைகளை

ஒழுங்குபடுத்த துவங்குகிறாய்.

பக்கங்களுக்கு சிறகு முளைத்து

கவிதைகளோடு

பறந்துவிடப்போகிறது .

மொத்தக்காட்டையும் எரித்த பின்பு

அடங்கித்தணியும்

தணலின் வெப்பம்

உனது முத்தம்.

மோகங்கள் கூடிப்பிரியும்

அங்காடித்தெருவில்

நாமிருவரும்

சந்தித்துக்கொள்ள நேர்ந்தது.

எதையாவது தந்தால் மட்டுமே

ஏதேனும் பெற முடியும்

என்ற நிலை வந்த பிறகும்,

தியாகங்கள் குறித்துப்பேசுதல்

பைத்தியக்காரத்தனம் ...

இருளடர்ந்த சாத்தியங்கள் குறித்து

இதுவரை

பேசாமலே இருந்து விட்டோம்.

வெளிச்சம் போலும் வாழ்வு

என்னும்

வெற்றுநம்பிக்கையில் இன்னும்

எத்தனை நாள்

ஓடப்போகிறது வண்டி.

மோகம் கொண்டலையும்

மனதின் பள்ளத்தாக்குகளில்

பறந்து திரியும் பறவைக்கு

வெளிச்சமும் வானமும்

வேறுவேறுதான்.

சாத்தியங்கள்

இருளடர்ந்த சாத்தியங்கள் குறித்து
இதுவரை
எதுவும் பேசாமலே இருந்துவிட்டோம்.
வெளிச்சம் போலும் வாழ்வு
என்னும்
வெற்று நம்பிக்கையில் இன்னும்
எத்தனை நாள் ஓடப்போகிறது
வண்டி.

,..