மழைதல் ...

மழை பெய்து தீர்ந்த இரவின் 

சத்தங்கள் குறித்து 

பேசிக்கொண்டிருக்கையில் 

உதித்தெழுந்த நிலவை 

நீ பார்த்தாய், 

நீ பார்ப்பதை 

நான் பார்த்தேன்.

இனி கொஞ்சம் மழை 

நிலவிலும் பெய்யட்டும்.

,..

பயணங்களின் காடு

காத்திருக்கும் ஒரு காடு 

இடையோடும் ஒரு பாதை 

அங்கிங்கெனாதபடி எங்கும் நிறையும் பயணம் 

இங்கிருப்பேன் நான் 

அங்கிருப்பாய் நீ 

இடையிருக்கும் மொழி 

,..

இழை-மறை . . .

எப்பொழுது வீழ்வேன் 

கொத்தித்தின்னலாம் என 

வட்டமிட்டுப்பறக்கிறாய்.

இழைந்திழைந்து 

வாழ்ந்தாகி விட்டது 

கொஞ்சம் நிமிர்ந்து நிற்க விடு. 

,..

இல்லையா?

சேர்ந்திசை ஒன்றின் 

இரு வேறு ஸ்வரங்களிலாய் 

இசைந்து கிடக்கிறோம். 

இசைத்திருக்கும் கணங்கள் முக்கியம் 

என்கிறேன் நான். 

இசையும் முக்கியம்

என்கிறாய் நீ.

இனி, 

அந்த ஒற்றைப்பாடலை 

நீ பாடினால் என்ன,

நான் பாடினால் என்ன,

இருவருமே பாடாமல் 

இருந்தாலும் என்ன?

,..

கண்-கூடு

கூடடைந்த பறவைகள்     

பறந்து திரிவதற்கான வானம்    

எதுவென்கிறாய்.

உன் கண்களை நிறைத்திருக்கும் 

கனவுகளில் மிதந்தபடி 

புன்னகைத்து வைக்கிறேன்.

,.. 

நீ

உனது பெயரின் கவிதை
திறக்கப்பார்க்கிறது 
அடைபட்டுக்கிடக்குமோர்
மிருகத்தின் கூண்டை
,..

இன்னும் ஓர் சொல் . . .

உறங்கிக்கொண்டிருக்கும் 

ஒரு சொல்லை 

எழுப்புகிறது 

பெருங்கனவொன்றிலிருந்து 

விழித்தெழுந்த 

மற்றொரு சொல்.  

,..